ولع رماد الشـوق يامعذبـي نـار
..........من كان يحلم باشتعـال الرمـادي
ماكنت احسب انه يكون اللقا حـار
..........ليـن التقينـا واشبكتنـا الايـادي
وقامت لنا الذكرى تغني على الطار
..........تنساب باسماعي نغم حـب هـادي
حسيت شي لفني مثـل الاعصـار
..........واستيقظت نشوة غـلاك بفـؤادي
اخذت لي سجه وانا شبـه منهـار
..........بين الخيال وبيـن علـمٍ وكـادي
وفزيت يوم انى تنبهت وش صـار
..........مثل الذى توه صحي مـن رقـادي
تغير الموقف بـلا سابـق انـذار
..........وغير المشاعر جت مشاعر جدادي
رديت لك عقب التجافي والانكـار
..........وطويت صفحات الزعل والعنادي
وتبددت ذيـك المبـادي والافكـار
..........ايه جنـون افكـار وايـه مبـادي
تـراي انـا مليتهـا لعبـه النـار
..........مـا احـد لعبهـا قبلناواستفـادي
من رد للجنه عقب صالـى النـار
..........حتى السموم يصير عنـده بـرادي
رائعة الشاعر
مساعد الرشيدي
موضوع: رمـاد الشــــــوق........... 
الأربعاء يونيو 11, 2008 1:25 pm
